أمسك حرامى

اصدقائى ازيكوا عاملين ايه؟
عندى سؤال :  عمر حد فيكوا حس ان اليوم بيعدى بسرعة و ما بتلحقش تلخص كل الحاجات اللى وراك ؟


                                                      زى ما يكون الوقت يتسرب من بين ايدينا 

و طبعا فى عز ما انت مضغوط و مطحون و بتحاول تخلص كل اللى وراك يجى حد و يفكرك بالمقولة الشهيرة 
                                          
                                                       الوقت كالسيف إن لم تقطعة قطعك 


و نسال نفسنا السؤال الازلى : هو مش كل  الناس عندها اليوم 24 ساعة ؟  طب ايه؟ 


اعمل ايه على شان الوقت ما يجريش ،، استنى شوية 

 و طبعا الوقت ما بيستناش حد و بيعدى اليوم 

طب نعمل ايه على شان الوقت ما يسرقناش؟؟

اولا : ورقة و قلم بسرعة .... مش ها اكمل كتابة الا لما تجيبوهم ... ها  ورقتك معاك و قلمك فى ايدك ابدا بالتسجيل 

  ها اكتب فى الورقة انا يومى باقضية ازاى 

عندى دروس ، محاضرات ، مشاوير ، مش ها انسى و قت النت و الفيس بوك طبعا ، و يا سلام لما يبقى كمان فى وقت للرياضة وله شوية مشى فى اليوم - الجرى ورا الموصلات ما يتحسبش فى الرياضة- متفقين و ها اسجل ده لمدة معقولة اسبوع او عشرة 

   

ها تسالونى الورقة دى ها تفيد فى ايه؟ ببساطة ها تعرف منها انت بتقضى يومك ازاى ، على فكرة ها تكتشف ان فى ساعات بتضيع فى حاجات مش مهمة و لا مستعجلة بيضع فيها يومنا 

ثانيا : التخطيط

 لازم تخصص يوم فى الاسبوع وليكن يوم الاجازة على شان تخطط للاسبوع و مواعيدك و تسجلها ودا مهم جداا على شان يساعدك على الترتيب  و تحديد الاولويات اكيد فى حاجات مهمة و مستعجلة لازم اشتغل عليها

فى مواعيد ثابتة - زى المحاضرات -  ها تحطها فى جدولك الاسبوعى

 فى حاجة مهمة  و انت بتخطط  اعمل حساب الاجازة - ايوه على شان تعرف ها تقضيها ازاى ، زى ما كلمتكوا قبل كدا فى موضوع التخطيط 

و حاول تسيب مكان للمفاجأت :) 

ثالثا: مهارات مفيدة 

اللى بيفرق و يخلينا نحس ان فى ناس عندها 48 ساعة فى 24 ساعة  الفاعلية 

لازم اعمل الحاجة بتقان اكتر --- ها تقولولى زى ايه ؟؟

زى انى استفيد لاقصى درجة من وقتى - انا مثلا ما كنتش بعرف اقرا فى الموصلات خالص بس كنت بسمع و بدرو على الكتب اللى اقدر اسمعها - مش لازم نقضى ال 7 ساعات بتوع الموصلات بنسمع اغانى ممكن يوم اغانى و يوم كتب

كمان لو قدرت ازود سرعتى فى القراية ها يفيدنى كتير خصوصا فى المذاكرة 

ازود مهارة التخطيط ودا ها يفدنى فى ادارة وقتى بكفاءة - الحقيقة التخطيط بيفيد فى حاجات كتير 

رابعا: لا تؤجل عمل اليوم الى الغد

الحكمة دى مفيدة جدااااااااااااا لان فعلا لما بنفضل نكسل و نقول ها اعمل الواجب اللى ورايا او الشغل بس اشرب القهوة او اشوف المسلسل ده بس بتكون النتيجة اننا ما بنلحقش نعمل حاجة و بتتراكم كل حاجة فوق دماغنا - و نرجع نقول الوقت مش مكفى 

موضوع التسويف و ترتيب اولويات موضوع ممهم جدااا على شان كدا ها اكلمكوا عليه البوست الجاى لوحدة 

طولت عليكوا 

اشفكوا البوست الجاى 

فاطمة