أسباب فشل الشركات الناشئة
لماذا تفشل معظم الشركات الناشئة في مصر والشرق الأوسط؟
6 اسباب لفشل الشركات الناشئة تعرف عليها قبل أن تبدأ
نسبة نجاح الشركات الناشئة لا تتعدى 5% حول العالم، وده مش في مصر بس، ده رقم عالمي. في شباب كتير عندهم أفكار حلوة، بس بيقعوا في نفس الأخطاء. في المقال ده هنتكلم عن أهم أسباب فشل الشركات الناشئة، خصوصًا في مجتمعاتنا العربية، ونوجّه الكلام بشكل خاص لـ جيل Z والشباب اللي عندهم شغف بريادة الأعمال.
1. الخلافات داخل فريق العمل وعدم وضوح الأدوار
أكتر سبب بيدمّر أي ستارت أب هو الخلاف بين المؤسسين. لما ما يكونش فيه تفاهم حقيقي أو توزيع واضح للأدوار، كل واحد بيشتغل في اتجاه، وده بيؤدي لفشل سريع حتى لو الفكرة نفسها قوية. لازم يكون فيه شراكة مبنية على الوضوح والاحترام والخبرة.
2. البدء بدون تمويل واعتماد مفرط على المستثمرين
فيه معتقد شائع إن "أنا هابدأ من غير تمويل، والمستثمر هيمولني". الحقيقة إن المستثمرين بيثقوا في الشخص اللي بيخاطر بفلوسه الأول، وكمان في الفريق نفسه. لو انت مش مستثمر في مشروعك، صعب تطلب من حد تاني يعمل كده.
3. غياب التخطيط الاستراتيجي
فيه أفكار عبقرية بتفشل لمجرد إن أصحابها ما خططوش لـ النمو والتوسع. لازم يكون فيه رؤية واضحة مش بس للبداية، لكن كمان لـ "إزاي نكبر؟ وإزاي نثبت نفسنا؟".
4. المنافسة وعدم التكيّف مع السوق
السوق بيتغير بسرعة، ولو مش سريع ومرن، هتخسر. من أهم أسباب النجاح إنك تكون فاهم السوق كويس، وتجرب منتج MVP، وتطور عليه بناءً على احتياجات العميل الحقيقية.
5. ضعف الخبرة الإدارية
الإدارة مش حاجة سهلة، بس برضو مش مستحيلة. لو عندك استعداد تتعلم وتسمع من الناس اللي سبقوك، هتوفر على نفسك سنين من التجارب الفاشلة.
6. التركيز على الاستثمار بدل من بناء المشروع
من خلال خبرتي في المجال، شفت شباب كتير بيركزوا على دورات الاستثمار وجذب المستثمرين، وينسوا يشتغلوا على بناء مشروع حقيقي. اللي بيبني بيكبر. ابني البزنس بتاعك بإيدك، واعرف إن المستثمر هييجي لما يشوف إنك فعلاً بنيت حاجة تستحق.
---
د/فطمة دياب
خلاصة المقال:
لو إنت من جيل Z وبتحلم تبقى رائد أعمال، خليك فاكر إن النجاح مش بييجي بالساهل. ريادة الأعمال مش بس فكرة حلوة، دي طريق طويل محتاج تخطيط، صبر، وشغل كتير.
ابدأ صح، ابني صح، وسيبها على ربنا... بس خد بالأسباب.
---
لو عندك أسباب تانية أو عايز تشارك تجربتك، اكتبلي في التعليقات!
#ماحدش_بياكلها_بالساهل
#ريادة_الأعمال
#startups_MENA
#جيل_Z_ريادي
تعليقات